دلتاوى

منتدى دلتاوى
 
الرئيسيةالرئيسية  دخولدخول  التسجيلالتسجيل  

شاطر | 
 

 رباعيات صلاح جاهين

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
love_soull
نائب مدير
نائب مدير
avatar


عَطآئي : 1504
عمـري : 31
الجنس : ذكر

مُساهمةموضوع: رباعيات صلاح جاهين   الخميس 14 يناير - 17:16

فتحت شباكي لشمس الصباح
ما دخلش منه غيــر عويل الرياح
و فتحت قلبي عشان ابوح بالألـم
ما خرجش منه غير محبه و سماح
عجبي !!!!

غمست سنك في السواد يا قلـم
عشان ما تكتب شعر يقطر ألـم
مالك جرالك إيه يا مجنون ... و ليه
رسمت ورده وبيت و قلب و علم
عجبي !!!

انا الذي عمري اشتياق في اشتياق
و قطر داخل في محطة الـفراق
قصدت نبع السم وشربت سم
من كتر شوقي وعشمي في التريـــاق
عجبي !!!

انا الذي عشت الزمن مضيعه
بروح حزينة معفنة مضعضعه
زرعت شجرة سنط لجل انجرح
لقتها شعر البنت و مفرعه
عجبي !!

لو فيه سلام في الأرض وطمان و أمن
لو كان مفيش و لا فقر و لا خوف جبن
لو يملك الانسان مصير كل شئ
انا كنت اجيب للدنيا ميت ألف ابن
عجبي !!

العشب طاطا للنسايم و نخ
أخضر طري مالهش في الحسن أخ
عصفور عبيط انا .. غاوي بهجه و غنا
ح انزلهنا.. و انشا لله يهبرني فخ
عجبي !!!

أوصيك يابني بالقمر و الزهور
أوصيك بليل القاهرة المسحور
و إن جيت في بالك .. إشتري عقد فل
لأي سمرا.. وقبري إوعك تـزور
عجبي !!!!




غمض عينيك و ارقص بخفة و دلع
الدنيا هي الشابة و انت الــــــــجدع
تشوف رشاقة خطوتك تعبــــــــدك
لكن انت لو بصيت لرجليك ....تـقع
عجبي !!!

حاسب من الاحزان و حاســـــــب لها
حاسب علي رقابيك من حبلـــــــــــها
راح تنتهي و لابد راح تنتهــــــــــي
مش انتهت أحزان من قبلهــــــــــا؟
عجبي !!!

يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي !!

ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و ان هب فيك عفريت قتيل إسألـــــــــه
ما دافعش ليه عن نفسه يوم ما اندبح
عجبي !!

ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في السترة و البنطلـــــون
عجبي !!!

خوض معركتها زي جدك ما خــــاض
صالب و قالب شفتك بامتـــــــــــعاض
هي كده...ما تنولش منها الأمـــــــل
غير بعض صد ورد ووجاع مخاض
عجبي !!!!

كام اشتغلت يا نيل في نحت الصخور
مليون بئونه و الف مليون هاــــتور
يا نيل أنا ابن حلال و من خلفتــــــك
و ليه صعيبه علي بس الأمــــــــور
عجبي !!!




منين أجيبها كلمه متألمـــــــــــــــــة
لعيبه فايره حايره و مصممــــــــــه
منين اجيبها كلمه تكون بنـــت ارض
تشفي اللي ما شافهوش كلام السمـا
عجبي !!!

أنا قلت كلمة و كان لها معنييـــــــــن
كما بطن واحده و توأمين زي وشين
لو دنيا شر.. التوأم الخير يمـــــــوت
لو دنيا خير .. الشر ح يعيش مــنين
عجبي !!

أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي
عجبي !!

بره القزاز كان غيم و أمطار و بــــــــرق
ما يهمنيش – أنا قلت – و لا عندي فرق
غيرت رأيي بعد ساعة زمـــــــــــــــــان
و كنت في الشارع .. و في الجزمة خرق
عجبي !!!

عيني رأت مولود علي كتف أمـــــــــــه
يصرخ تهنن فيه يصرخ تضــــــــــــمه
يصرخ تقول يا بني ما تنطق كـــــــلام
ده اللي ما يتكلمش يكتر همـــــــــــــه
عجبي !!!!

يا عندليب ما تخافش من غنوتك
قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك
عجبي !!!

ياللي بتبحث عن إله تعــــــــــــبده
بحث الغريق عن أي شئ ينجـــده
الله جميل و عليم و رحمن رحــيم
أجمل صفاته .. وانت راح توجده
عجبي !!!




حقرا و فوق كوكب حقير محتقـــــــر
في الكون تكون دنياكو إيه يا بــــــقر
رملايه من صحرا ؟ لكين إيش تقول
و الكون بحاله جوه عقل البشــــــر
عجبي !!

لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره
عجبي !!

ياللي في حماه الشمس تلقي المــــلاذ
و ألف بكره و بكره .. في ضلوعه لاذ
مين أنت ؟ مارد ؟ رب ؟ قال لأ ده بس
انا اللي باروي القمح و اسقي الفــولاذ
عجبي !!!

غسل المسيح قدمك يا حافي القـدم
طوبي لمن كانوا عشانك خــــــــدم
صنعت لك نعليك أنا يا أخــــــــــــي
مستني إيه .. ما تقوم تدوس العدم
عجبي !!!!

البط شال عدي الجبال و البحــــــور
ياما نفسي اهج .. احج ويا الطــيور
أوصيك يا ربي لما اموت .. و النبي
ما تودنيش الجنه .. للجنه ســـــــور
عجبي !!!

طال انتظاري للربيع يرجــــــــــــــع
و الجو يدفا و الزهور تطلــــــــــــع
عاد الربيع عرمرم شبـــــــــــــــاب
إيه اللي خلاني ابتديت افــــــــزع ؟
عجبي !!!

و لو اتضنيت و فنيت وعمري انفرط
مش عاوز الجأ للحلول الوســـــــــط
و كمان شطط و جنون مانيش عــاوز
يا مين يقول لي الصح فين والغلــــط
عجبي !!





عاد الربيع كأنه طعم الحــــــــــــــــــب
و الحب نار جوه العروق بتصـــــــــب
اتمتع ازاي بيه وانا متقطـــــــــــــــع
من كتر خوفي لا في الخطيئة يطب ؟
عجبي !!

ازاي شبابنا يقوم و ياخـــــــــد دوره
من غير صراخ يئذيه و يجرح زوره
يا هلتري أحسن له يقعد ساكـــــــــت
أو ينترك و لو خرج عن طــــــوره ؟
عجبي !!!

عيني رأت عصفور ووياه ابـــــــــنه
بيحدفه في الريح و ياخده ف حضنه
نوبتين و تالت نوبه – عجبي عليهم –
كانوا سوا بيرفرفرا و يغنـــــــــوا
عجبي !!!!

احسن ما فيها العشق و المعشقــــــة
و شويتين الضحك والتريقـــــــــــــة
شفت الحية . لفيت . لقيت الألــــــــذ
تغييرها . و ده يعني التعب و الشقا
عجبي !!!

عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبي !!!

في الهو ماشي يا بهلوان إش إِش
يا فراشة منقوشة علي كل وش
شقلبت عقلي و عقلي شقلبني
و كنت باحسبني بقيت ما اندهش
عجبي !!

وقفت ساعة الصبح باغسل سناني
قالت لي شايف قوتي و لمعاني ؟
إيش تطلب اليوم مني ضحكة أسد ؟
والا ابتسامة اعلانات أمريكاني ؟
عجبي !!


الحلو يم اليم صابــــــــــح رايح
سارح في حضن الميه سابح سايح
الحلو داب في البحر , قلــــت أدوقه
وجدت لسه البحر برضك ماــــــلح
عجبي !!!

يا كل كلمة للعجب في قامــــــــــــوس
انسكلوبيديا لسان العرب أو لا لاروس
تعالوا نجدة . ده لسه في عصـــــرنا
الشمس و البحر العريض بالفـــلوس
عجبي !!!!

الموج تلول تهبط وتطلع تلــــــــــــول
يا بحر خدني الشط صاحبك ملـــــــول
و الا بلاش الشط ح اعمل به أيـــــــه
ده ريحته طحلب مهري و ام الخلــول
عجبي !!!

ما آنتاش بتلعب ليه يا روح بابــــا ؟
و لا عسكري و لا لص في عصابة ؟
إلعب أسد أو ديب رهيب أو غـــــزال
دي الدنيا في نهاية المطاف غابـــــة
عجبي !!!

ورد في ورق سلوفان يا حلوة اهديلك ؟
و الا انقله بالطين في الشتلة و اجيلـــــك
الأولاني لو وحا بحنــــــــــــــــــــــانــي
عجبي علي التاني بإيــــــــه يوحيلــــــــك
عجبي !!

أنا قلبي كوكب و انطلق في المدار
حواليكي يا محبوبتي يا نور ونـــار
يلف مهمــــا يلف ما بيكتفــــــفيش
وتمللي نصه ليل و نصه نهــــــــار
عجبي !!

الأرض شوك أيوه لكين هايش
و الحمرة مش يعني الطريق حايش
دي دمنا السيال .. وبشرة خيـــــــر
ان انتي عايشة و ان كنت أنا عايــش
عجبي !!!
الرجوع الى أعلى الصفحة اذهب الى الأسفل
ashe2_ba7eb
دلتاوي ملكي
دلتاوي ملكي
avatar


عَطآئي : 1843
عمـري : 28
الجنس : ذكر

مُساهمةموضوع: رد: رباعيات صلاح جاهين   الخميس 14 يناير - 20:07

اقتباس :
يأسك و صبرك بين إيديك و انت حر
تيأس ما تيأس الحياه راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
عجبي !!


تسلم ايدك يا محمد بجد
كلام جميل
تقبل مرورى

ورده ورده
الرجوع الى أعلى الصفحة اذهب الى الأسفل
love_soull
نائب مدير
نائب مدير
avatar


عَطآئي : 1504
عمـري : 31
الجنس : ذكر

مُساهمةموضوع: رد: رباعيات صلاح جاهين   السبت 16 يناير - 21:57

مشكور مرورك الجميل يا حودة
ومنورني دايما بردودك الاجمل
الرجوع الى أعلى الصفحة اذهب الى الأسفل
MAHMOUD.BEBO
نائب مدير
نائب مدير
avatar


عَطآئي : 264
عمـري : 33
الجنس : ذكر

مُساهمةموضوع: رد: رباعيات صلاح جاهين   الأحد 17 يناير - 1:25

بجد مجهووووووووووووووووووود رائع كانت بدور عليها اساسا


أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي
عجبي !!
الرجوع الى أعلى الصفحة اذهب الى الأسفل
love_soull
نائب مدير
نائب مدير
avatar


عَطآئي : 1504
عمـري : 31
الجنس : ذكر

مُساهمةموضوع: رد: رباعيات صلاح جاهين   الأحد 17 يناير - 1:27

مشكور ياجميل لمرورك
الرجوع الى أعلى الصفحة اذهب الى الأسفل
 
رباعيات صلاح جاهين
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
دلتاوى :: زوايـــا حرة :: المنتدى الادبـى-
انتقل الى: